Comment se doict faire dépans de noces.
Noces somptueuses & de trop grans despens donnent & apportent damaige senz honnour.
Des despens.
Despans faiz pour Chevalerie est honorables. Despans faiz pour aidier à ses amis est raisonnables. Despans faiz pour aidier a folz larges sont perdus.
De glotenie.
Ta masniee tu dois norrir de grosses viandes, non mie delicieuses. Car quicunques est glouton a paine seroit il jamaix aultrement que avec la mort. Tel mours de glotenie ne changeroit. Gloutenie est li porriture dou vil & negligent home. La gulosité & li maingier de l’ome cusansons & diligent est solais. En jours pasquieres & halz & annalz doies repaistre & norrir ta masniee habundamment, non mie deliciouzement.
De ton avarice & escharteteit.
Fay ta bource plaidier à ta goule, & si te pren bien garde de cui & pour qui tu seraiz advocas. Et se il avient que entre la goule & la bourse tu soies juges, le plus souvent non mie pour lai goule, mais pour lai bourse rens & donne ta sentence. Car li goule si prueve par affection, son desir & entention, ne ses tesmoignages point ne juge de veritei dire. Mais li bourse prueve son entention evidemment & deuement par la huge, par la voie, par lou grenier, par lou celier, qui de tous biens sont veudies; ou en brief temps seront veudies. A dont tu plaidies mal & aprement encontre la goule, quant avarice clot la bource. Jamaix avarice justement & droitement ne jugerait entre lai goule & la bourse. Et quelle chose est avarice? c’est li murtriere d’elle mesmes, que se avarice doubte povretei, & en vivant en povrete vit li aveirs en soy, senz point perdre ses richeces. Mais souvent avient que il garde auz autres. Mieulz vault asseiz gardeir auz aultres richeces, que de les perdre en luy meisme.
De ton bleit.
Se il avient que tu aies habundance dou bleit, ne aime ne ne desire chartei, car al qui couvoite & desire le chier temps, couvoite & desire le chier temps, couvoite & desire estre homicide & murtrier de povres gens. Vent ton bleit quant il est a souffisant pris, & non mie quant li povre n’en puet acheteir. A tes voisins ven lou a mainre prix & aussi a tes anemis. Car on ne vaint mie adeiz son anemi par glaive, mais souvente foix par boire & par maingier & aultre servise. Orgueil encontre son voisin, c’est un bauduei qui attent le tonnoire avec la saiette.
{1386}Desanemis.
Aiz tu des anemis, donne toi en garde que avec estranges gens que tu cognois n’aies mie tai conversation ne familiere. Pense adez les voies que ton anemi tient, & pense encor que ton anemi est saige & malicieu, la fleuetei de ton anemi semble estre paix, maix ce n’est que true pour un pou de temps. Se tu tasseure que ton anemi point ne pense ce que tu pensez, tu te exposes & livres en grant peril.
De tes femes.
Se elles sont suspectes, ce qu’elles font ne quier mie d’en avoir connoissance, ains quier l’ignorance, car quant tu saurais lou crime de ta mauvaise feme, de nul phisicien tu ne porraiz estre gariz. Adonc atremperaiz la doulour de ta malvaise feme quant semblables malz orraiz des femes des aultres. Noble & hault cuer ne quiert point des oeuvres ne des faiz des femes. Par rire & par ruseir chastieraiz mieulx la malvaise feme que par baston. Vielle feme menant pute vie de corps est putain, se li loy lou souffroit, que on la deveroit vive enterreir & ensevelir.
Des robes.
Robes trop coustaniables & sumptueus est dueue prueue de petit sens. Robe de trop grant apparence au voisin tost & ligierement engenre anui, & pourtant estudie a estre plaisant par bonté mieulz que par vesture. Feme qui ait asseiz vestement & demande robe sus robe, n’est mie segnefiance de grant fermetei ne estaubletei.
Des amis.
Retient adez plus celluy que tu trouveras plus vraiz amis, & plus celluy qui lou sien met enti, que celluy qui se offre a toi de parole. Grant copie & recouvriers & grant foison est d’amis de paroles. Ne repute point ton ami cellui qui te loue en tai presence.
Comment on doit donneir conseil.
Se tu donnes conseil a ton ami ne quier mie plaire a lui, mais principalement a raison & a droit. En conseillant di a ton ami: d’une teile choze mon semblant est teil, & non mie faiz ensi, ou précisement on doit ensi faire, & li cause si est, car on est plustost blasmeis & redargueis d’un conseil dont il vient mal & que lissue soit mauvaise, que on n’est loueiz de boin conseil.
Des Jougleurs & Menestrers.
Or escoute diligemment se li Jougleour te visete, entent ce que ci apres sensuit. Home entendus au Jougleurs, asseiz tost auerait une feme que on appelle povretei. Et qui serait tes filz? cest derision & moquerie. Et se il avient que les jeus des Jougleurs & les paroles d’eulz te plaisent, fayn de les oyr & que aultre part tu pense. Cellui qui rit & qui se entent auz paroles des Menestrerz de bouche, en ceci faisant ait iai donné à lui {1387}gaaige. Jugleurs & teilz disours qui reprochent malz & pusfaiz sont digne destre pendus. Queilz chose est un Jougleurs qui malz & pechiez & honte repreuve? cest un home qui porte lou couraige dun murtrier. Les instrumens des Jougleurs onques ne pleirent à Dieu.
De tes vallés.
Quant tu veraiz un vallet qui ait hault cuer, boute lou arriere, com cellui qui ou temps avenir seroit ton anemi. Resiste au vallet qui a ton voisin te loue, ou certainement il pense quil tait deceut. Le vallet qui de legier se hontoie, aime lou com ton enfant & com ton filz. Boute arriere de toi lou vallet qui connioit & se glorifie & prise ses mours com bones.
Des edifices.
Se tu veulz edifier maison, à ceu lai faire temoigne necessitei, non mie curieuse & vaine volentei. Li couvoitise de édifier n’est point ostée en edifiant; trop grant couvoitize de édifier, especialement quant elle est desordonée, enfante & attent & fait venir lou vendaige de l’edifice. Tours parfaite & accomplie & lai huge qui est voidée sont lome très-saige, mais c’est trop tart.
De tes vendaiges.
Veulz tu vendre aucune fois! garde toi que partie de ton heritage ne vendois mie à plus puissant de toi, ansois lou donne a plus petit prix & à meilleur marchie à mainte de toi, & se tu lou veulz tout vendre à cellui qui plus en offre, ci lotroie & lou vent, maix encor vault mieulx famine grieve, que vendre son patrimoine. Et toutevoie ancor vault mieulx vendre son patrimoine, que estre soubgiz auz usures. Et queile chose est usure? certes c’est li velins dou patrimoine. Car cest un cortois laron, qui preche & dit ce que il entent au dedens. Ne achette riens dou plus puissant de toi, soit compains de la marchandise. Quant tu es acompagnies avec un povre en marchandise, souffre lou pacianment & le soupporte à ceste fin que plus fort de. ti ne metoisse en compagnie ou lieu de lui.
Comment tu dois useir de vin.
Tu me demandes de la maniere de user dou vin? cellui qui en très-grant habundance de divers vins est soubres; teilz est dieux terriens. Saichez que yvrongne ne fait riens a point. Mais quant elle chiet en lordure, te sens tu du vin? fuy la compagniee. Quier lou lit pour dormir, plustost que de ti deragnier. Car cellui qui par parleir se veult excuseir de yvrongne, il accuse son yvrongne, & prueue clairement. Il siet trop mal à un jone home de cognoistre lou vin, aussi fait il à une feme.
Des Fisiciens.
Fuy il Fisicien qui est yvrongne & qui est advocaz, & te varde dou mire qui enti veult esprouveir par experience, comment de semblant maladie garirait les aultres. Fuy li Fusicien plains de science, qui n’est mie exerciteiz par pratique & par experience approuveiz.
{1388}Deschiens.
Les petis chiens lasse auz clers & au roines, les chiens qui sont pour vardeir brebis ou maison, sont proufitables. Les chiens pour chacier & veneir il coustent plus quil ne profitent à l’osteil, & moins y font venir.
De tes fils.
Se tu aiz des fils ne les faire mie dispenseurs des biens.
De fortune.
Ces choses oyz tu me diras: se fortune mest contraire, que me profite lai doctrine de vivre? Car fortune destruirait tout ce que tu m’enseignes. O par escoute que je ai veu de ceci. J’ai veu des folz qui lassient les chozes avenir & la provision de leur estait & se excusient sus fortune: mais saiche que qui bien ces enseignemens garderoit, sus fortune ne se excuseroit, ne de riens ne colperoit fortune. Trop pou souvent on acompaigne & sont ensemble diligence & fortune contraire. Et semblablement pou sont desevreiz negligence & fortune, li folz attant que Deux le porvoice en sa povreté, come lou perisseux. Mais il ne pense mi comment Deu commande par l’Euvangile à villeir. Et pourtant veille & contrepoise la ligieriteit de ton cuer de voloir despendre, avec la difficultei & lai poine que on ait au gaingnier.
Dou testament faire.
Vechi que viellesce aproche: je te conseille que à Dieu plustost que a ton filz tu te commette & recommande; quant tu veulz faire testament je te consoille que devant toutes chozes faicez paier tes servans & maignies, a ceulz solement qui monstreront quil aimet ta personne, ne lour commet mie ton aime. Mais commet lai à ceulz qui ameront lour propres aimes. Tu te dois mettre à point & disposeir & ordeneir ton estait & darriene volentei, avant que li maladie te prengne, car souvent avient que li personne est sers & serians à la maladie. Et selonc les drois li sers ne puet faire testament, & pourtant fai ton testament quant tu es franc, avant que tu deviegne sers.